جولای 17, 2019

له افغانستان تلویزیون سره د اسلامي امارت د ویاند ذبیح الله مجاهد مرکه/پښتو متن

له افغانستان تلویزیون سره د اسلامي امارت د ویاند ذبیح الله مجاهد مرکه/پښتو متن

یادونه:

څو ورځي وړاندي د اسلامي امارت ویاند ښاغلي ذبیح الله مجاهد له افغانستان تلویزیون سره د هیواد په روان وضعیت باندي ځانګړې او مفصله مرکه لرله، د مرکې اهمیت ته په کتلو د الاماره ویب پاڼي همکارانو یاده مرکه پښتو ته وژباړله او خپلو درنو کتونکو ته يې وړاندي کوي

سلام وخت مو په خیر ښاغلی مجاهد صاحب له افغانستان ټلویزیون سره ځانګړې مرکې ته ښه راغلاست

وعلیکم السلام ورحمة الله مننه خدای دي وکړي چې تاسي او ستاسي ټول  درانه لیدونکي جوړ یاست، او هیله ده چې زما سلامونه قبول کړئ، مننه کوم چې وخت مو راکړ .

ښاغلی مجاهد زه بلال یم نکټایي او درېیشي په تن له تاسي سره خبري کوم، که تاسي کابل ته راشئ، د سولي خبري کومه نتیجه ورکړي، د یو داسي هلک په لیدلو به مو غبرګون څه وي ؟

بسم الله الرحمن الرحیم حامداً ومصلیاً اما بعد:

افغانستان یو داسي هیواد دی چې ډېر تکلیفونه او زخمونه یې لیدلي دي ، او څو ځله د اشغالګرو له لوري د یرغل هدف ګرځېدلی دی ، اوس له اتلسو کلونو را هیسي موږ په جنګ کې واقع  یو، که جنګ پای ته ورسیږي، او اشغال ختم شي، زما په فکر ټول اولس د دې طرفدار دی چې یو له بله ګډ ژوند ولري، هیڅ یوه تن ته هم تهدید نه وي، او هیڅ کله یو هیواد وال هم د بل هیواد وال له لوري، د تکلیف او زحمت سره مواجه نشي.

ولي یو شی ډېر مهم دی هغه دا چې زموږ هیواد د اسلامي او شرعي نظام د حاکمیت لپاره ډېري قربانۍ ورکړي دي ، د اسلامي نظام اسلامي ازښتونو دفاع او حاکمیت د ټولو هیواد والو مشترک ارمان دی، ښایي تاسي هم دغه ارمان لرئ، زه یې هم لرم او په  ځانګړې توګه  د هیواد ټول ځوانان په همدې ارمان دي ، ځوانان ټول پوهیږي چې زموږ هیواد یو اسلامي هیواد دی ، او ټول دا غواړي چې یو له بله د ورور ولۍ ، میني او خواخوږۍ ژوند ولري.

مطلب مو دادی چې د بلال نوري په څېر ځوان مو له نکټایي او دریشي سره قبول دی ؟

جامه، یا لباس اوس مهال د بحث وړ موضوع نه ده، جامه باید د یوه  اسلامي حکومت له لوري خلکو ته وښودل شي، طبعاً زموږ هیواد خپله ملي، اسلامي جامه لري، د همدې جامې د تشهیر او همدې ملي اسلامي جامې ته د هیواد والو د تشویق لپاره باید له بېلابېلو لارو کار وشي هغه که د تعلیم یا معارف له لاري  وي او یا هم د رسنیو او میډيا له لاري، ځوانان او ټول هیواد وال باید خپله ملي جامه ښه وګڼي، د پردو له فرهنګ واردولو څخه ډډه وکړي، خو بیا هم زه نه غواړم چې دلته د جامې نوعیت په هکله مخالفت یا موافقت وکړم، دا یوه داسي مسئله ده چې د هیواد له راتلونکي سره تړلې ده طبعاً، د یوه آزاد اسلامي نظام له لوري به یې لارښونه کیږي.

ډېره مننه ښاغلی مجاهد صاحب ، د قطر په دوحه کې څه روان دي ؟که وضاحت ورکړئ

ښایي تاسو زموږ ننۍ یوه اعلامه لیدلې وي چې د بین الافغاني غونډی د لغوه کېدو په هکله وه، دا چې د کابل ادارې له یادي غونډي وېره درلودله، لکه څرنګه چې په مسکو کې د بین الافغاني غونډي د مخنیوي لپاره زیات کوښښونه وکړل، خو ونه توانېدل چې کوم خنډ واقع کړي، د دوحې بین الافغاني غونډه قصداً د کابل ادارې له لوري له خنډ سره مخ شوه، فی الحال، موږ په دوحه کې د کومي بین الافغاني غونډي پلان نلرو.

که د قطر هیواد مرکز دوحه کې خبري دوام ونه کړي، ستاسي راتلونکی اقدام به څه وي ؟او آیا خبري به دوام وکړي که نه ؟

موږ ته مهمه او عمده مسئله د یرغلګرو حضور دی، موږ لکه څنګه چې مو خپله مذاکراتي پالیسي جوړه کړې ده، چې لومړی باید د افغان قضیې بهرنی بعد حل شي، تر څو افغانان مستقل شي، د خپلي ارادې خاوندان شي، په داخل کې د نظام لپاره تصمیم نیونکي شي ، اوس مهال موږ د خارجي بعد حل ته ترجیح ورکوو له امریکایي جهت سره مو مذاکرات مخ په وړاندي روان دي، او نتیجې ته هم هیله شته چې وبه رسېږو، نو هرکله چې بهرنی بعد حل شي، بیا په داخلي بعد کې هم توافقاتو ته رسېدلای شو .

ښاغلی مجاهد تاسي له امریکایي استازو سره په ترسره شویو ناستو کې کومو توافقاتو ته رسېدلي یاست؟

له امریکایانو سره دوحه کې ترسره شوي مذاکرات چې شپږم پړاو ته یې په انتظار کې یو، او هیله زیاته ده چې په همدې پړاو کې توافقاتو ته ورسیږو، په مخکو تېرو شویو غونډو کې کوم توافق ته نه یو رسېدلي، خو ډېر د پام وړ، ژور بحثونو په ګڼو مسائلو باندي شوي، چې جزئیات به یې له توافقاتو وروسته نشر شي .

ښاغلی مجاهد تاسې کوم بحثونه درلودل؟

دوه ټکي ډېر مهم وو یو له هغوی څخه د اشغال پای ته رسول زموږ لپاره مهمه مسئله وه، امریکایان باید افغانستان پریږدي، دغه ډول امریکایانو د افغانستان له راتلونکي، یا له اسلامي امارت څخه تشویش درلود، هغوی ته اطمنان ورکول شو چې د افغانستان خاوره د چا په ضد نه استعمالیږي، او زموږ له لوري به دوی ته کوم خطر نه وي .

 

ښاغلی مجاهد کولای شئ چې په دې موضوع هم څه ووایاست چې د ۲۵۰ کسانو لیست چې د حکومت د استازو تر عنوان لاندي نشر شوی وو، طالبانو ته د منلو وړ وو؟

بین الافغاني ناسته چې موږ یې لټون کې وو، اماده ګې مو ورته نېولې وه زموږ هیله دا وه چې د همدې ناستي له لاري امکان لري عام ذهنونه، او متنازع فکرونه څه ناڅه نژدې والی سره پیدا کړي ،نهایي لیست چې زموږ او کوربه هیواد چې د ناستي د ترتیب لپاره یې تخنیکي ګروپ هم ټاکلی وو هم  تائید کړی وو، د هغو تخنیکي ګروپ ته سپارل شوی وو ، په همدې مهال د کابل په ارګ کې یوه غونډه تر سره شوه، نوی لیست یې وړاندي کړ چې ۲۵۰ کسان پکې وو، دغه تعداد د کنفرانس له شرائطو او امادګیو سره تطابق نه درلود، له همدې امله موږ لیست هم رد کړ او ناسته هم لغوه شوه .

دغه ناسته چې لغوه شوه او تاسي یې په ادامه هم تاکید لرئ نو بیا له چاسره باید تاسي خبري وکړئ ؟ که یې نوم یادولای شئ نوم یې هم یاد کړئ .

تاسي پوهیږئ چې موږ یو لیست تائید کړی وو ، هغه لیست کې هم له دواوړ لوریو تر دوه سوه زیات کسان شامل وو ، زموږ له لوري ۲۵ کسان په دې لیست کې وو، نور پاتي علماء، مخور، او متنفذین وو ، دغه راز هغه کسان هم وو چې له افغانستانه مهاجر دي هغوی ته هم کنفرانس کې د ګډون بلنه ورکول شوې وه ، دغه ډول سیاسي جهتونه، که راغلي وای او ناسته ترسره شوې وای ښایي ښه نتیجه یې ورکړې وای.

اوس چې دا نتیجه لاس ته رانغله څه پایلي به ولري ؟

اوس مهال خو دا ناسته لغوه شوه، راتلونکي کې که بیا زمینه برابره شي، زه څه نشم ویلای خو یو لوی او ښه فرصت ضائع شو ، یوه خبره ښکاره ده چې کابل اداره نه غواړي دا ډول غونډي ترسره شي، دوی غواړي چې جنګ هم دوام وکړي، اشغال هم اوږد شي.

د دوحې په ناسته کې د امریکایي هیواد نقش په څومره اندازه مؤثر وو ؟

په همدې بین الافغاني ناسته کې خو زه د دوی نقش نه وینم ښایي په ترسرکولو سره یې دوی خوشحاله وي ځکه د دوی لپاره یو بهانه ده چې افغانان خپل منځ کې ناستي سره وکړي ترڅو دوی په مسؤلانه ډول له افغانستانه ووځي، ځکه دوی وایي چې افغانان باید خپل منځ کې سره کېني خو د دې غونډي په ترسره کولو او د اشخاصو په را غونډولو کې د دوی کوم نقش نه وو .

آیا ویلای شئ چې امریکایانو له تاسي سره د سولي او کابل ته ستاسي تر راتګ وروسته څه وعدې درسره کړي دي ؟

موږ له امریکایانو کومه وعده نه غواړو موږ غواړو چې زموږ خاوره پریږدي، خپل اشغال پای ته ورسوي، زموږ ځمکه او فضا چې اوس مهال  د دوی له لوري تر غصب او اشغال لاندي آزاده کړي، تر څو موږ  افغانان د یوه آزاد او مستقل ملت په توګه وپېژندل شو او په موږ چې په تېرو اتلسو کلونو کې کوم وحشتونه او مظالم ترسره شوي دي هغه تلافي شي ، موږ د دې غوښتونکي یو چې زموږ حقوق ومنل شي، او د آزادۍ غوښتني غږ مو واورېدل شي .

ښاغلی مجاهد ستاسي دغه غوښتني په څومره کچه د منلو وړ دي، او ترکومه بریده منل شوي دي؟

طبعاً زموږ حقوق خو به هغه وخت اعاده کیږي چې موږ کوم توافق ته ورسیږو، اوس مهال امریکایان هم دا غواړي چې اشغال پای ته ورسوي، دوی چې د افغانستان له خاوري د کوم خطر احساس کوي، دوی ته باید اطمنان ورکول شي موږ هم کوښښ کوو چې دوی ته اطمنان ورکړو، ترڅو هغه  ادعا چې د جنګ سبب ګرځي درست نه دی او هیله شته چې کوم توافق ته ورسیږو .

د مسکو غونډي د سولي په خبرو کې کوم رول ولوباوو ؟

د مسکو غونډه کې ټول افغانان شاهدان دي چې ډېري مخالفي څېرې چې له کلونو کلونو یې مخالف نظرونه درلودل او ګڼ فکري بعدونه یې هم سره درلودل، تر ډېره بریده سره نژدې شول، په یوه مېز او یوه مجلس سره حاضر شول، چې دا په تېرو کلونو کې نه وو ترسره شوي ، دغه راز هغه بحثونه چې یاده غوڼده کې وشول، ګډه اعلامیه چې د ټولو په توافق نشر شوله، د ټول ملت ارمان وو، په ځانګړې توګه د یرغلګرځواکونو وتل او د اسلامي نظام د حاکمیت ملاتړ، د یوه آزاد او مترقي افغانستان ګډ هدف ګرځول، دا ټول د ښه راتلونکي په لوري، ښه ګام ګڼلای شو .

ښاغلی مجاهد طالبان د قدرت د نیولو په فکر کې دي ؟

زه باید دا یوه یادونه وکړم چې د قدرت د ترلاسه کولو په شوق کې نه یو، داسي قدرت چې موږ یواځي خپل ځانونه چوکۍ ته ورسوو، او د افغانستان په راتلونکي ځان مسلط کړو، دغه راز د افغانستان د مسؤلیت دا دروند پېټی پخپله خپلو اوږو ته واچوو، اما بل طرف کې که موږ لږ دقیق  شو افغانستان کې اتلس کاله د یرغل په مقابل کې  جهاد د اسلامي نظام د حاکمیت لپاره ترسره شو، په همدې جهاد کې ډېري زیاتي قرباني ورکړل شوې، دغه راز څلوېښت کاله وړاندي ته که وګورو د شوروي یرغلګرو په ضد جهاد کې موږ یونیم میلیون شهیدان د اسلامي نظام د حاکمیت لپاره ورکړل متأسفانه چې د شر او فساد خوښونکو له لوري، دې ارمان ته ونه رسېدلو، د جهاد نتیجې ته موږ  دا هیله او امید لرو چې په نتیجه کې یې د اسلامي نظام حاکمیت راشي، د اسلامي نظام حاکمیت ډېر مهم دی، دا په دې معنی نه ده چې موږ د ځان لپاره قدرت غواړو د اسلامي نظام د حاکمیت لپاره چې هرڅوک وړ کس وي، باید غور پرې وشي ، موږ د ځان لپاره د قدرت خپلول په هیڅ صورت نه غواړو د اسلامي نظام حاکمیت زموږ د ملت له لویو ارمانونو څخه دی په همدې خاطر هم مبارزه کوو.

ښاغلی مجاهد تاسي وایاست اسلامي نظام مطلب مو اسلامي امارت دی ؟

اسلامي نظام خپل تعریف لري ، دا مهمه نه ده چې څه نوم باید ولري، د اسلامي نظام لپاره فقهاء کرامو ګڼ نومونه تعین کړي دي، مهمه داده چې حاکمیت اسلامي وي، په دې معنی چې د نظام محتوا اسلامي احکام وي، قوانین یې له شریعت سره  تطابق ولري.

ښاغلی مجاهد ستاسي له نظره اوس مهال په نړۍ کې کوم هیواد اسلامي نظام لري چې ټول قوانین یې په پوره توګه اسلامي وي، د یوه هیواد نوم راته اخیستلای شئ ؟

په تأسف سره په هیڅ هیواد سره هم مثال نشم ورکولای، خو دا باید ووایم چې هیڅ هیواد هم زموږ په څېر له یوه لوی ابر قدرت سره اتلس کاله او همداراز له شوروي یرغلګرو سره څوارلس کاله جهاد نه دی کړی، نو موږ یو استثنائي او امتیاز درلودونکی ملت یو او په نور هیوادونو نه شو ور قیاس کېدلی .

دا امتیاز خو بیرته د یوبل ضد جګړې ته راګرځي ډېر وخت ویل کیږي چې دوه افغانان مثلا د طالبانو ډله او افغان امنیتي ځواکونه چې په افغانستان کې وجود لري پخپلو کې سره وژني ؟

یو واقعیت باید روښانه شي هغه دا چې د هري مسئلې په هکله باید یو ژور فکر وشي، راتلونکی یې له ګڼو زاویو تر پام لاندي ونیول شي، د داډول مهمو مسئلو په هکه سرسري او سطحي فکر نه ښایي چې وشي، شوروي اتحاد افغانستان اشغال کړی وو، له کمونستي کودتاه وروسته چې د ثور په اتمه ۱۳۵۷ شمسي کال باندي ترسره شوه ، کمونیستانو کوښښ وکړ چې کمونیستي عقیده هیواد ته را وارده کړي، چې وروسته یې عملاً نظامي اشغال ته هم دوام ورکړ، نو په دغه مهال که یرغلګرو روسانو له یو شمېر افغانانو د زر او زور له لاري خپل کار واخیست او د خپل ملت په ضد یې استعمال کړل، افغان اولس مجبور وو چې همدغه افغانان له منځه یوسي تر څو د روسي یرغلګرو د وحشت لاسونه لنډ شي او دا دهر هیواد مجبوریت دی چې د تېري ګرو ملاتړ کونکي که څه هم خپل هیواد وال یې وي له منځه یې یوسي  او هغه ملاتړ کونکي ملي خائنين بلل کیږي.

ښاغلی مجاهد ډېر وخت ویل کیږي چې ستاسي مالي سرچینې ګاونډیو او ځينو غربي هیوادونو اړوند دي، تاسي په دې هکله څه وایاست؟

یو خو تورونه او ګمانونه دي بل واقعیت دی ، واقعیت دادی چې هیڅ هیواد هم که ګاونډيان دي یا نور هیوادونه زموږ ملاتړ نه کوي او نه څوک زموږملاتړ کولای شي، ټول هیوادونه له امریکاڅخه په ډار کې دي، له همدې امله یې زموږ داعیه هم نه بدرګه کوله، زموږ د جهاد د ملاتړ سرچینه یواځي او یواځي زموږ اولس دی ، دا زموږ مظلوم او در دېدلی اولس دی چې د جهاد ټولي ستړیاوي یې په ځان منلي او دا خپله فریضه ګڼي.

ښاغلی مجاهد صاحب ویل کیږي چې تاسي تر خپل واک لاندي ګڼو ولسوالیو کې عشر زکات اخلئ او حتی د اخیستلو ورقي یې هم دباندي راوتلي دي ؟

هو له خپل اولس څخه یې اخلو همدا اولس دی چې د خپل عشر او زکات تر څنګ په ګڼو لارو زموږ مرسته کوي .

د ډار له امله یې در کوي که پخپله خوښه، ځکه ویل کیږي چې دوی تاسي ته دعشر او زکات تر نامه لاندي پيسې د ډار له امله درکوي؟

نه دا خو ښکاره خبره ده زموږ اولس ټول مسلمان او په دین مین اولس دی، دوی خپله د عشر زکات فریضه هم پيژني دغه راز د جهاد فریضه هم پيژني، دغه کسان چې زموږ په صفونو کې له فاریابه تر ننګرهاره، له کونړه تر پکتیا له کندهاره تر مزاره، هام تر کندوز او بدخشان پوري چې په جهاد بوخت دي، دا ټول د همدې اولس بچیان دي، یو داسي ملت چې خپل بچیان د جهاد لپاره لېږلی شي، ښکاره خبره ده چې خپل مال هم د جهاد په لار کې مصرف کولای شي، او دا یوه دیني فریضه ګڼي له همدې امله خو زموږ پراخ ملاتړ هم کوي .

آیا د یوه مسلمان په وړاندي جهاد فرض دی ښاغلی مجاهد؟

جهاد د مسلمان په وړاندي نه؛ بلکه د امریکا په وړاندي فرض دی، خو هغه نا اهله مسلمان چې همدې جګړې ته د کافر د ملاتړ لپاره راوتلی دی ، هغه یو مزدور جوړ شوی دی ، د هغه وژل او له منځه وړل واجب دي، د کافر د ملاتړ کونکو په هکله قرآن کریم تصریح لري، له مسلمانانو څخه چې څوک د کفارو مرسته وکړي هغه د کفارو په څېر دی، مسلمانان باید له هغوی سره د کفارو په څېر معامله وکړي، موږ د یوه مسلمان ملت په توګه دا عقیده لرو کومو افغانانو چې له روسي اشغال سره مرسته کړې ده، هغه هم واجب القتل وو، او تر هغه وړاندي چې د شاه شجاع کسانو له انګریزانو سره مرسته کوله هم واجب القتل وو، نو څوک چې اوس له ناټو او امریکا سره زموږ د ملت په ضد مرسته کوی، عین حکم لري ، او عین معامله به ورسره ترسره کيږي .

تاسي چې وایاست اولس  له تاسي سره دي ، تاسي ته عشر زکات درکوي، ولي د سولي اړوند خپلي ناستي په افغانستان کې نه ترسره کوئ ، تاسي خو د سولي خبرو لپاره مسکو یا قطر ته ځئ او هلته خپلي غونډي ترسره کوئ؟

لکه څرنګه چې مخکي ما یادونه وکړه تر هرڅه وړاندي باید د افغان قضیې بهرنی بعد حل شي، په دې معنی چې فضا او ځمکه زموږ په اختیار کې نه دي، هر کله چې موږ وتوانیږو د خبرو یا د زور له لاري د فضا او ځمکي اختیار واخلو بیا په هیواد کې دننه د مسائل حل او هرڅه ته زمینه برابره وي.

ښاغلی مجاهد مسکو زموږ په اختیار کې دی؟

نه هلته مو هم اختیار نشته، خو تضمینونه وجود لري، هلته څوک چاته خطر نشي متوجه کولای، مګر افغانستان کې موږ نشو کولای چې یوه درې سوه کسیزه ناسته ولرو او موږ مصئون  هم ووسو چې بمباري به نه ترسره کیږي، په مسکو او نورو هیوادونو کې لږ ترلږه دا مصئونیت وجود لري .

له قطر څخه مسکو ته د تګ لپاره تاسي ویزې له کوم ځای څخه تر لاسه کړې ؟

دا خو یوه ډېره سطحي مسئله ده، د ویزو تر لاسه کول او سفري اسناد تیارول،  کومه پیچلې موضوع نه ده، زموږ مرکچیان د سفر اسناد لا وختي لري، او که ځينو يې اسناد نه لرل د قطر هیواد په ځانګړې الوتکه کې هلته ورسول شول.

یعني تاسي ویزې له کابل څخه واخیستلې که له پاکستان څخه ښاغلی مجاهد؟

موږ په خپلو افغاني پاسپورټونو ولاړو او ویزه مو د اړونده هیوادونو وه.

د افغان اولس یوه لویه برخه مېرمني او ځوانان، اندېښني لرې، او ستاسي لپاره یې سرې کرښي هم معلومي کړي دي او زیاتوي چې د طالبانو په راتګ سره زموږ دا سره کرښه ده، نو ستاسي په راتګ باندي اندېښمنو کسانو ته ستاسي لیدلوری څه دی ؟

دا اندېښني چې را پیدا شوي ټولي د همدې اتلسو کلونو په جریان کې د دښمن له تبلیغاتو څخه را ټووکېدلي دي، دا چې ټول مطبوعاتي وسائل د دښمن په لاس کې دي او په موږ پسي پوچ تبلیغات کوي، ګڼو لوریو ته یې یو ډول ډار ور پيدا کړی دی خو دا حقیقت نه دی، زموږ هدف دادی چې د اسلامي نظام حاکمیت راشي، ټول خلګ خپل خپل حقوق تر لاسه کړي، د افغانستان مېرمني مسلماني دی، دوی پوهیږي چې اسلام ډېر حقوق دوی ته ورکړي دی، دوی ته به اسلامي حاکمیت کې ټول حقوق ورکول کیږي، موږ دوی ته اطمنان ورکوو،دغه راز ځوانانوته هم، البته یو شی باید واضح کړو که موږ پردی کلتور خپله سره کرښه وګڼو، دا به په افغان اسلامي ټولنه کې یو غیر معقول عمل وي.

مېرمني خو د زده کړو او مطبوعاتي پرمختګ په برخه کې اندېښنې لري، تاسي کوم حقوق ورته ورکولای شئ؟ .

طبعاً ټول افغانان د تعلیم حق لري هغه که مېرمني دي که نارینه دي او په دې برخه کې باید موږ زمینه ورته برابره کړو، خو د تعلیم چاپيریال باید د اسلام  او ملي افغاني کلتور او عنعناتو مخالف نه وي، دغه ډول نصاب او طرزالعملونه یې هم باید د اسلامي اصولو او کړنلارو مطابق وي، په داسي بڼه باید مېرمنو ته د کار او تعلیم زمینه برابره شي چې دوی خپل کار او تعلیم ته په ډاډه زړه ولاړي شي، او په لاره کې آزار او په تکلیف نشي، څنګه چې تاسي خبر یاست په ځلونو له مطبوعاتو دا خبره را وتلې ده چې په مختلفو سطحو او طریقو ښځې له تجاوز او اذیت سره مخ دي، دوی باید په مصؤنه توګه خپل تعلیم او کار ته ادامه ورکړي، کورنۍ چې خپلي لوڼي کار یا تعلیم ته لیږي هغوی هم باید د امنیت او د عزت د خوندي توب له پلوه مطمئن وي .

ډېری وخت تاسي یو شمېر بریدونه غندئ، په داسي حال کې چې ستاسي د بریدونو په مهال هم یو شمېر عام وګړي خپل ژوند له لاسه ورکوي، که تاسي کابل ته راشئ، او یا هم د سولي خبري کومي پایلي ته ورسیږي، دوی ته به مو ځواب څه وي؟

هغه ځایونه چې ملکي تلفات موږ ته پکې منسوبیږي، هغه باید مشخص شي، مثلاً کوم ځای کې خدای مه کړه موږ ملکي خلګ په نښه کړي دي؟ هغه کسان چې د کابل ادارې په لیکو کې د امریکایي یرغلګرو په خدمت کې دي ، هغوی باید عام ملکي او بې ګناه کسان ونه ګڼل شي.

ښاغلی مجاهد صاحب، تاسي په داسي مهال کې اوسني حکومت ته د کابل اداره وایاست چې تاسي یوځل خپله له همدې نظام سره د یوه نظام په بڼه اوربند وکړ، اوس تاسي د کابل ادارې نوم ورته کاروئ، اوس چې د ادارې په توګه یادوئ نو بیا مو ولي اوربند ورسره وکړ؟

اوربند د یوه هدف او مقصد په موخه ترسره شو، تر څو هیواد وال د اختر درې ورځي په اطمئنان او خوښۍ سره ولمانځي،  موږ د کابل له ادارې سره اوربند نه دی کړی او نه مو هم له امریکایانو سره اوربند کړی دی ، د خپل اولس د هوسایي په موخه مو اوربند وکړ، تر څو اختر په خوښۍ سره تېر کړي، اوربند هیڅکله په دې معنی نه دی چې د کابل ادارې مشروعیت ترلاسه کړ او د امریکا له غلامي راووته .

ستاسي مالي سرچینې چې تاسي وایاست د اولس عشر زکات دی، آیا په دومره کچه یې بللای شو چې یوه ولایت ته سقوط پرې ورکړئ، زه فکر نه کوم چې لیري پرتو سیمو کې دي عام وګړي دومره پيسې ولري چې د یوه ولایت د سقوط لپاره دي کفایت وکړي، عامو وګړو ته ستاسي مالي سرچینې یوه مغلقه پوښتنه ښکاري؟

د افغانستان وګړي الحمدلله ټول مسلمانان دي، او په الهی نصرت او مرسته باور او عقیده لري، د څو کسانو په مالي مرسته د یوه ولایت سقوط کومه عجیبه خبره نه ده، بله داچې زموږ ډير کارونه له تعجب څخه ډک دي، آیا دا تعجب نه دی چې د امریکا په څېر یوه ابر قدرت ته مو ماتي ورکړه؟ دا د تعجب وړ خبره نه ده چې د ناټو سازمان غوندي پوځ چې فکر یې کیږي هغه ډول عصري وسلې، استخبارات، پيسې او هرڅه لري خو بیا مو هم  شکست ورکړ؟ دا تعجب وړ نه ده چې اتلس کاله په دې ناچیزه وسلو باندي جهادي مقاومت په دې ډول روان دی چې هیڅ ډول درز او خلاء نه په رهبري کې تر سترګو کیږي او نه هم په افرادو کې زموږ دا ټول کارونه د تعجب وړ دي، مسلمانان پوهیږي چې دا د الله مرسته ده، او د الله رحمت دی، څوک چې العیاذ الله له مجاهدینو سره د الله په مرسته باور نه لري هغوی دي بیا فکر وکړي چې داڅنګه ترسره شول.

دا سوال مي ځکه وکړ چې ویل کیږي تاسي د مخدره قاچاق، کرکیله او کاروبار کوئ او دا ستاسي د مالي امکاناتو لویه برخه جوړوي؟

د مخدره موادو تولید، قاچاق او کاروبار د اشغال زېږنده ده، موږ د خپل حاکمیت په مهال د مخدره موادو کښت صفر ته را ټیټ کړی وو، کله چې یرغلګر راغلل خلګ یې تشویق کړل ترڅو د مخدره موادو کرکيلي ته مخه کړي او تجارت یې د وزیرانو او د پارلمان د وکیلانو په سویه پيل شو، صادارت یې د هوایي ډګرونو له لاري ترسره کیږي،  ښایي د همدې مخدره موادو د نقل لپاره هم کوم هوایي پټ دهلیز چمتو شوی وي، نو د مخدره موادو ټوله لاسته راوړنه یرغلګرو او د هغوی غلامانو ته رسیږي، بزګران چې کښت يې کوي، دومره لوړې پيسې نشي ترلاسه کولای چې د یوه ولایت د سقوط لپاره کفایت وکړي، یا د امریکا په څېر لوی قدرت ته ماتې پرې ورکول شي، نو په دې اړه تصور سم نه دي، که دا خبره سمه هم وګڼو، نو موږ چې هرڅومره د مخدره موادو له کښت څخه پيسې تر لاسه کړو، بیاهم د امریکا پيسې تر هغو څو چنده زیاتي دي، نو خبره د پيسو نه بلکې د عقېدې او هوډ ده.

ډېر ځله چې یوه ولسوالۍ یا سیمه د طالبانو لاس ته لویږي نو هغه ځای کې د مخدره موادو کښت زیاتیږي او امنیتي ځواکونه مکلف دي چې هغه له منځه یوسي، تاسي دې پوښتني ته څه ځواب لرئ؟

زموږ تر حاکمیت لاندي سیمو کې موږ د مخدره موادو کښت کونکي، د خپل مجبوریت له مخي نه منع کوو، زموږ لومړی مجبوریت دادی چې بزګرانو ته د هيڅ بدیل وس نه لرو، مثلاً د امارت د بشپړ حاکمیت په مهال موږ بزګران د بدیل کښت د تشویق له لارې دې ته را وستل چې دا کښت بند کړي، اوس که موږ کوم بزګر له دې کښت څخه منع کوو هغه مجبور دی له موږ څخه د بدیل غوښتنه کوي، له همدې امله موږ دوی نشو منع کولای دوهم مجبوریت دادی چې موږ نه غواړو چې د همدې کښت په سر له اولس سره خپل مناسبات خراب کړو، اولس له موږ سره په ډېر غټ کار چې هغه جهاد دی مصروف دی، نو که موږ په وړو وړو مسائلو له خپل اولس سره په تصادم کې واقع کیږو، نود جهاد په لار کې مشکلات ایجادیږي او دا زموږ یو مجبوریت دی، موږ یې خپله کښت نه کوو، کښت یې په سیمو کې بزګران کوي، قاچاق یې هغه کسان کوي چې ډالر لري او د انتقال لاري یې په اختیار کې دي.

ښاغلی مجاهد طالبان په څو ټوټو ویشل شوي دي؟

د اسلامي امارت مجاهدین ټول یوه موټي دي، ښایي تاسي ته په اوربند کې معلومات شوي وي چې مجاهدین ویشلي نه دي بلکي سره متحد او یو موټی دي.

په مشخصه توګه کومو کسانو د قطرناسته رد کړه؟ تاسي که او که د قطر هیواد؟

د قطر ناستي د لغوه کېدو باعث د کابل اداره شوه، دوی یو داسي لیست وړاندي کړ چې مخکي یې په بل لیست توافق کړی وو، موږ پوه شو چې د کابل اداره اصلاً دې ناستي ته اهمیت نه ورکوي.

آیا د قطر ناسته که ترسره شوې وای یا که یې ادامه پیدا کړه لاسته راوړني به ورسره وې، یا به یې ولري؟

که ستاسي مقصد له امریکایانو سره ناستي وي ، نو ښایي چې ښې پایلي ولري، مګر اوس مهال موږ د کومي  بلې غونډي لپاره تابیا نلرو.

له امریکایانو سره ستاسي راتلونکې ناسته به کله ترسره شي؟

پلان داسي دی چې دواړه مذاکراتي ټيمونه به د ناستي نېټه تعینوي بیا ناسته ترسره کیږي، هیله لرو چې ناسته به ترسره شي .

د افغانستان تلویزیون

ځواب ورکونکی ذبیح الله مجاهد د اسلامي امارت ویاند

 

 

Related posts